लांझेडा पुरातन महादेव मंदिरात महाशिवरात्रीचा दिव्य उत्सव; नगराध्यक्ष प्रणोती निबोंरकर व नगरसेवक सागर निबोंरकर यांनी केली विधिवत पूजा!
भाविकांच्या सुख-समृद्धीसाठी केली प्रार्थना; नागरिकांशी साधला संवाद
दि. 15/02/2026
गडचिरोली : हिंदू धर्मातील अत्यंत पवित्र आणि श्रद्धेचा उत्सव असलेल्या महाशिवरात्रीच्या पावन पर्वावर गडचिरोली शहरातील प्रभाग क्र. २, लांझेडा येथील पुरातन महादेव मंदिरात भक्ती, श्रद्धा आणि अध्यात्माचा संगम अनुभवायला मिळाला. पहाटेपासूनच मंदिरात भाविकांची मोठी गर्दी उसळली होती. “हर हर महादेव”च्या गजराने संपूर्ण परिसर दुमदुमून गेला होता.
या शुभप्रसंगी नगराध्यक्ष अॅड. प्रणोती सागर निबोंरकर व नगरसेवक सागर निबोंरकर यांनी पहाटेच्या मंगल क्षणी मंदिरात उपस्थित राहून भगवान भोले शंकराचे विधिवत दर्शन घेतले. मंत्रोच्चार, अभिषेक व आरतीच्या माध्यमातून त्यांनी महादेवाच्या चरणी नतमस्तक होत भाविकांच्या सुख-समृद्धी, आरोग्य व समाधानासाठी प्रार्थना केली.
महाशिवरात्री हा केवळ उत्सव नसून श्रद्धा, संयम आणि भक्तीचा संदेश देणारा पर्व आहे. भगवान शंकराची आराधना केल्याने जीवनातील संकटे दूर होतात, मनाला शांती लाभते आणि सकारात्मक ऊर्जा प्राप्त होते, अशी भाविकांची श्रद्धा आहे. मंदिरात रुद्राभिषेक, भजन-कीर्तन आणि आरतीचे कार्यक्रम भक्तिमय वातावरणात पार पडले.
नगराध्यक्ष अॅड. प्रणोती निबोंरकर यांनी महाशिवरात्रीच्या शुभेच्छा देत भगवान महादेवाच्या कृपेने सर्वांच्या जीवनात आनंद, आरोग्य आणि समाधान नांदावे, अशी मंगल कामना व्यक्त केली. समाजात ऐक्य, बंधुभाव आणि सद्भावना वृद्धिंगत व्हावी, हा या पवित्र दिवसाचा खरा संदेश असल्याचे त्यांनी नमूद केले.
नगरसेवक सागर निबोंरकर यांनीही उपस्थित भाविकांशी संवाद साधत मंदिर परिसराच्या विकासासाठी आवश्यक सुविधा उपलब्ध करून देण्याची ग्वाही दिली. श्रद्धा आणि परंपरेचे जतन करणे ही आपली सामूहिक जबाबदारी असल्याचे त्यांनी अधोरेखित केले.
या प्रसंगी मंदिर समितीचे पदाधिकारी, स्थानिक नागरिक तसेच महिला-पुरुष भाविक मोठ्या संख्येने उपस्थित होते. संपूर्ण परिसर दिव्यांच्या प्रकाशाने व भक्तिरसाने उजळून निघाला होता. अशा भक्तिमय वातावरणात महाशिवरात्रीचा उत्सव अत्यंत उत्साहात आणि भक्तिभावाने साजरा करण्यात आला.
