गडचिरोली पोलिसांची मोठी कामगिरी : महिलेच्या हत्येचा अवघ्या १२ तासांत छडा, दोन आरोपी जेरबंद
तालुका मुख्यालयाजवळील मेंढा येथे घडलेल्या महिलेच्या हत्याकांडाचा अवघ्या १२ तासांत छडा लावत गडचिरोली पोलिसांनी उल्लेखनीय कामगिरी बजावली आहे. स्थानिक गुन्हे शाखा आणि गडचिरोली पोलीस स्टेशनच्या संयुक्त पथकाने दोन आरोपींना अटक केली असून एका विधीसंघर्षित बालकालाही ताब्यात घेतले आहे. या जलद कारवाईमुळे पोलिसांच्या तपास कौशल्याचे पुन्हा एकदा दर्शन घडले आहे.
मिळालेल्या माहितीनुसार, ८ मे २०२६ रोजी सायंकाळच्या सुमारास मेंढा येथे अक्षय भानारकर यांच्या राहत्या घरी रामकला सुरवदेव किरंगे (रा. हिंडवा, ता. कुरखेडा) यांचा मृतदेह आढळून आला होता. या घटनेमुळे परिसरात मोठी खळबळ उडाली होती. घटनेची गंभीरता लक्षात घेऊन पोलिस अधीक्षकांनी तातडीने तपास यंत्रणा सक्रिय केली.
उपविभागीय पोलिस अधिकारी यांच्या नेतृत्वाखाली विशेष तपास पथकाची स्थापना करण्यात आली. तपासादरम्यान पोलिसांनी तांत्रिक माहिती, मोबाईल लोकेशन तसेच गोपनीय सूत्रांच्या मदतीने संशयितांचा माग काढला. त्याआधारे संशयित सुदामा रामभाऊ चौधरी याला चंद्रपूर येथून ताब्यात घेण्यात आले.
सखोल चौकशीत सुदामा चौधरी याने आपल्या दोन साथीदारांच्या मदतीने रामकला किरंगे यांची हत्या केल्याची कबुली दिली. त्यानंतर पोलिसांनी सुदामा रामभाऊ चौधरी (वय ३३, रा. शिरसगाव, ता. संगमनेर, जि. अहमदनगर) तसेच चेतन धर्मीराव खोब्रागडे (रा. इंदिरानगर, गडचिरोली) यांना अटक केली. याशिवाय एका विधीसंघर्षित बालकालाही ताब्यात घेण्यात आले आहे.
अटक करण्यात आलेल्या आरोपींना न्यायालयासमोर हजर करण्याची प्रक्रिया सुरू असून विधीसंघर्षित बालकाला बाल न्याय मंडळासमोर हजर करण्यात येणार आहे. या प्रकरणाचा पुढील तपास पोलीस उपनिरीक्षक अतुल तराळे करीत आहेत.
ही संपूर्ण कारवाई पोलिस अधीक्षक एम. रमेश, अपर पोलिस अधीक्षक (प्रशासन) गोकुल राज जी., उपविभागीय पोलिस अधिकारी अनिकेत हिरे यांच्या मार्गदर्शनाखाली स्थानिक गुन्हे शाखेचे पोलिस निरीक्षक अरुण फेगडे, स.पो.नि. भगवतसिंग दुलत, पो.नि. विनोद चव्हाण, पोउपनि. शिवाजी देशमुख, माधुरी मिसाळ, भावना राठोड तसेच अधिकारी व कर्मचाऱ्यांच्या पथकाने पार पाडली.
गंभीर गुन्ह्याचा अल्पावधीत छडा लावून आरोपींना अटक करण्यात यश मिळवल्याबद्दल गडचिरोली पोलिसांच्या कार्याचे सर्वत्र कौतुक होत आहे.
या बातमीसाठी इमेज तयार करून द्या
