नगराध्यक्षा अॅड. प्रणोती सागर निंबोरकर यांच्या हस्ते रामपुरी शाळेतील सांस्कृतिक कार्यक्रमाचे उद्घाटन
गडचिरोली :
नगर परिषद प्राथमिक रामपुरी शाळा, गडचिरोली येथे विद्यार्थ्यांच्या सुप्त कलागुणांना वाव देणाऱ्या भव्य सांस्कृतिक कार्यक्रमाचे आयोजन करण्यात आले होते. या कार्यक्रमाचे उद्घाटन नगराध्यक्षा अॅड. प्रणोती सागर निंबोरकर यांच्या हस्ते उत्साहात पार पडले.
कार्यक्रमाच्या प्रारंभी विद्येची अधिष्ठात्री देवी माता सरस्वती तसेच स्त्री शिक्षणाच्या प्रणेत्या क्रांतीज्योती सावित्रीबाई फुले यांच्या प्रतिमेला पुष्प अर्पण करून कार्यक्रमाची औपचारिक सुरुवात करण्यात आली.
यावेळी नगर परिषद उपाध्यक्ष निखिल चरडे, बांधकाम सभापती अनिल कुनघाळकर, शिक्षण सभापती हर्षल गेडाम, शिक्षण उपसभापती शिल्पा हेमके, शाळेचे मुख्याध्यापक, शिक्षकवृंद, शिक्षकेतर कर्मचारी, विद्यार्थी-विद्यार्थिनी तसेच पालक मोठ्या संख्येने उपस्थित होते. कार्यक्रमस्थळी उत्साहाचे व आनंदाचे वातावरण पाहायला मिळाले.
कार्यक्रमात विद्यार्थ्यांनी नृत्य, देशभक्तीपर गीत, समूहगायन, नाट्यप्रवेश आदी विविध सांस्कृतिक सादरीकरणातून प्रेक्षकांची मने जिंकली. विद्यार्थ्यांच्या सादरीकरणाला उपस्थित मान्यवर व पालकांनी टाळ्यांच्या कडकडाटात दाद दिली.
उद्घाटनप्रसंगी मार्गदर्शन करताना नगराध्यक्षा अॅड. प्रणोती सागर निंबोरकर म्हणाल्या की, “शालेय जीवनात केवळ शैक्षणिक ज्ञानच नव्हे तर सांस्कृतिक कार्यक्रमांमधून विद्यार्थ्यांचा सर्वांगीण व्यक्तिमत्त्व विकास होतो. अशा उपक्रमांमुळे आत्मविश्वास, नेतृत्वगुण आणि संघभावना निर्माण होते.” नगर परिषद शाळांच्या सर्वांगीण विकासासाठी आपण सदैव प्रयत्नशील राहू, असेही त्यांनी नमूद केले.
शाळेच्या शिक्षकवृंदांनी कार्यक्रमाच्या यशस्वी आयोजनासाठी विशेष परिश्रम घेतले. पालकांनीही शाळेच्या उपक्रमांचे कौतुक करत समाधान व्यक्त केले.
या सांस्कृतिक कार्यक्रमामुळे रामपुरी शाळेच्या परिसरात आनंदी व उत्साही वातावरण निर्माण झाले असून, विद्यार्थ्यांसाठी हा दिवस अविस्मरणीय ठरला.
