लोहार समाज व फर्निचर ठेकेदारांच्या वतीने विश्वकर्मा जयंती उत्साहात साजरी!
लावण्या प्लायवुड येथे धार्मिक व सामाजिक कार्यक्रमांचे आयोजन
गडचिरोली :
जगाला कला, कौशल्य व सर्जनशीलतेची दिशा देणारे सृष्टीचे महान शिल्पकार भगवान विश्वकर्मा यांची जयंती लोहार समाज व फर्निचर ठेकेदारांच्या वतीने गडचिरोली शहरातील लावण्या प्लायवुड येथे मोठ्या उत्साहात व भक्तिभावात साजरी करण्यात आली.
कार्यक्रमाची सुरुवात भगवान विश्वकर्मा यांच्या प्रतिमेचे विधिवत पूजन करून करण्यात आली. पूजनानंतर उपस्थित मान्यवरांनी भगवान विश्वकर्मा यांच्या कार्याचा व त्यांच्या विचारांचा गौरव केला. कारागीर, लोहार व फर्निचर व्यवसायाशी संबंधित समाजबांधवांनी आपल्या कौशल्याच्या जोरावर समाजाच्या प्रगतीत दिलेले योगदान उल्लेखनीय असल्याचे मत यावेळी व्यक्त करण्यात आले.
जयंती उत्सवानिमित्त आयोजित कार्यक्रमात समाजातील व्यापारी, ठेकेदार व कामगार मोठ्या संख्येने सहभागी झाले होते. अशा उत्सवांमुळे समाजातील एकोपा अधिक दृढ होतो, परंपरागत व्यवसाय टिकून राहतो तसेच नव्या पिढीला मेहनत, गुणवत्ता व प्रामाणिकपणाचे महत्त्व समजते, असे प्रतिपादन मान्यवरांनी केले.
या जयंती कार्यक्रमास नंदू भाऊ कुमरे (शिवसेना संघटक), सुधाकर पेटकर (भाजप कामगार मोर्चा अध्यक्ष), नरेश हजारे, नरेश केलझरकर (सरस्वती फर्निचर), सोमनाथ उईके (लावण्या प्लायवुड) यांची प्रमुख उपस्थिती लाभली. यावेळी मान्यवरांनी भगवान विश्वकर्मा यांच्या विचारांचा आदर्श घेऊन व्यवसायात गुणवत्ता, विश्वास व नवनवीन तंत्रज्ञानाचा अवलंब करण्याचे आवाहन केले.
तसेच गणेश फर्निचर, अतुल मुर्वतकर, चंदू चंदनखेडे, किशोर मेश्राम, मंगेश हजारे, भूपेश चंदखेडे, विजय उईके, रवी कोसरे यांच्यासह अनेक नामांकित फर्निचर ठेकेदार, यशस्वी व्यापारी तसेच कामगार मोठ्या संख्येने उपस्थित होते. उपस्थितांनी एकमेकांना जयंतीच्या शुभेच्छा देत सामाजिक ऐक्याचा संदेश दिला.
कार्यक्रम शांततापूर्ण, शिस्तबद्ध व भक्तिमय वातावरणात पार पडला. शेवटी आयोजकांनी उपस्थित मान्यवर, व्यापारी, कामगार व समाजबांधवांचे आभार मानले. उपस्थितांनीही कार्यक्रमाच्या यशस्वी आयोजनाबद्दल आयोजकांचे कौतुक करत समाधान व्यक्त केले.
