गणपती विसर्जनासाठी नगरपरिषद प्रशासन सज्ज — नगराध्यक्षा ॲड. प्रणोती सागर निंबोरकर
मामा तलाव परिसरात विसर्जनाची जय्यत तयारी; पर्यावरणपूरक गणेश विसर्जन करण्याचे नागरिकांना आवाहन
गडचिरोली : गणेशोत्सवाच्या पार्श्वभूमीवर गडचिरोली शहरातील श्री गणरायाच्या विसर्जनासाठी नगरपरिषद प्रशासन सज्ज झाले असून, शहरातील प्रसिद्ध मामा तलाव परिसरात दरवर्षीप्रमाणे यंदाही गणपती विसर्जनासाठी आवश्यक व्यवस्था करण्यात आली आहे, अशी माहिती गडचिरोली नगर परिषदेच्या नगराध्यक्षा ॲड. प्रणोती सागर निंबोरकर यांनी दिली.
गणेश विसर्जनासाठी मामा तलाव परिसरात येणाऱ्या सार्वजनिक गणेश मंडळांसह घरगुती गणपतींच्या भाविकांची संभाव्य गर्दी लक्षात घेऊन नगरपरिषद प्रशासनाकडून स्वच्छता, प्रकाश व्यवस्था, सुरक्षित प्रवेश व निर्गमन मार्ग, विसर्जनस्थळाची स्वच्छता तसेच आवश्यक मनुष्यबळाची व्यवस्था करण्यात आली आहे. भाविकांना कोणत्याही प्रकारची गैरसोय होऊ नये, यासाठी नगरपरिषद प्रशासनाने आवश्यक नियोजन केले आहे.
पर्यावरणाचे संवर्धन ही आपल्या सर्वांची सामूहिक जबाबदारी आहे. त्यामुळे गणेशभक्तांनी विसर्जनादरम्यान तलाव व परिसरात निर्माल्य, प्लास्टिक, थर्माकोल तसेच इतर कचरा टाकू नये. विसर्जनानंतर तलाव परिसर स्वच्छ राहील यासाठी नागरिक व गणेश मंडळांनी नगरपरिषद प्रशासनाला सहकार्य करावे, असे आवाहन नगराध्यक्षा ॲड. प्रणोती निंबोरकर यांनी केले.
विसर्जनाच्या वेळी कोणताही अनुचित प्रकार घडू नये तसेच भाविकांना सुरक्षित आणि सुरळीतपणे गणरायाला निरोप देता यावा, यासाठी संबंधित यंत्रणांमध्ये समन्वय ठेवून आवश्यक नियोजन करण्यात आले आहे. विशेषतः मामा तलाव परिसरातील स्वच्छता, सुरक्षितता आणि पर्यावरण संरक्षणाला प्राधान्य देण्यात आले आहे.
“गणेशोत्सवाचा आनंद साजरा करतानाच पर्यावरणाचे रक्षण करणेही तितकेच महत्त्वाचे आहे. नागरिकांनी शिस्तबद्ध व पर्यावरणपूरक पद्धतीने गणपती विसर्जन करून नगरपरिषद प्रशासनाला सहकार्य करावे,” असे आवाहन नगराध्यक्षा ॲड. प्रणोती सागर निंबोरकर यांनी केले आहे.
