कर्तव्यांचे पालन केल्यास सर्वांना अधिकार मिळतील; आकाश सातपुते यांचे गोविंदपूर येथे प्रतिपादन
गोविंदपूर येथे डॉ. बाबासाहेब आंबेडकर जयंती उत्साहात साजरी
गोविंदपूर:
भारतीय संविधानाचे शिल्पकार भारतरत्न डॉ. बाबासाहेब आंबेडकर यांची जयंती गोविंदपूर येथे मोठ्या उत्साहात साजरी करण्यात आली. या निमित्ताने आयोजित कार्यक्रमात सामाजिक ऐक्य आणि संविधानातील कर्तव्यांच्या पालनाचा जागर करण्यात आला.
कार्यक्रमाच्या अध्यक्षस्थानी गोविंदपूरचे पोलीस पाटील श्री. राजू पा. मेश्राम होते. प्रमुख पाहुणे म्हणून भाजपा किसान मोर्चाचे जिल्हाध्यक्ष श्री. विलास पा. भांडेकर, भाजपा युवा मोर्चाचे जिल्हा महामंत्री श्री. आकाश सातपुते, येवली ग्रामपंचायतीचे उपसरपंच श्री. प्रीतम गेडाम आणि सामाजिक कार्यकर्ते श्री. यमाजी पिपरे प्रामुख्याने उपस्थित होते.
याप्रसंगी उपस्थितांना मार्गदर्शन करताना श्री. आकाश सातपुते यांनी संविधानिक मूल्यांवर प्रकाश टाकला. ते म्हणाले, “डॉ. बाबासाहेब आंबेडकरांनी दिलेल्या संविधानामुळे आपल्याला जगण्याचे अधिकार आणि नागरिक म्हणून काही कर्तव्ये मिळाली आहेत. आजच्या काळात आपण आपल्या हक्कांबद्दल आग्रही असतो, परंतु अनेकदा कर्तव्ये पार पाडताना मागे पडतो. जर समाजातील प्रत्येक घटकाने आपली जबाबदारी आणि कर्तव्ये प्रामाणिकपणे पार पाडली, तर कोणाच्याही अधिकारावर गदा येणार नाही आणि सर्वांना न्याय मिळेल.”
कार्यक्रमाचे अध्यक्ष श्री. राजू पा. मेश्राम यांनीही बाबासाहेबांच्या विचारांची प्रासंगिकता स्पष्ट केली.
*पोलीस भरतीत प्रथम आलेल्या आकाश कुळमेथेचे स्वागत:*
पोलीस भरती प्रक्रियेत आदिवासी गटातून ११८ गुण मिळवून प्रथम क्रमांक पटकावल्याबद्दल आकाश यशवंत कुळमेथे याचा मान्यवरांच्या हस्ते शाल, श्रीफळ व पुष्पगुच्छ देऊन सत्कार करण्यात आला. “गावातील तरुणांनी अशाच प्रकारे जिद्द आणि चिकाटीने यश संपादन करून गावाचे नाव लौकिक करावे,” अशा भावना यावेळी व्यक्त करण्यात आल्या.
कार्यक्रमाची सुरुवात महामानवाच्या प्रतिमेला माल्यार्पण करून करण्यात आली. यावेळी गावातील नागरिक, महिला व युवक मोठ्या संख्येने उपस्थित होते.
कार्यक्रमाच्या यशस्वीतेसाठी डॉ. बाबासाहेब आंबेडकर जयंती उत्सव समिती गोविंदपूर च्या स्थानिक कार्यकर्त्यांनी विशेष परिश्रम घेतले. यावेळी गावातील प्रतिष्ठित नागरिक मोठ्या संख्येने उपस्थित होते.
