नगराध्यक्ष अॅड. प्रणोती सागर निंबोरकर यांच्या हस्ते महात्मा ज्योतिबा फुले यांना अभिवादन; समता, बंधुता आणि शिक्षणाच्या विचारांना उजाळा
गडचिरोली | प्रतिनिधी :
समता, बंधुता आणि शिक्षणाचे अग्रदूत तसेच समाजक्रांतीचे महान पुरस्कर्ते क्रांतीसूर्य महात्मा ज्योतिबा फुले यांच्या जयंतीनिमित्त गडचिरोली नगर परिषद येथे आदरांजलीचा भावपूर्ण कार्यक्रम आयोजित करण्यात आला. या प्रसंगी नगराध्यक्ष अॅड. प्रणोती सागर निंबोरकर यांच्या हस्ते महात्मा फुले यांच्या प्रतिमेला पुष्पहार अर्पण करून अभिवादन करण्यात आले.
कार्यक्रमात उपस्थित मान्यवरांनी महात्मा फुले यांच्या कार्याचा गौरवपूर्ण उल्लेख करत त्यांच्या विचारांची आजच्या समाजात अधिक गरज असल्याचे प्रतिपादन केले. शिक्षणाच्या माध्यमातून समाजातील वंचित, शोषित घटकांना मुख्य प्रवाहात आणण्याचे महान कार्य महात्मा फुले यांनी केले. त्यांच्या समतेच्या आणि बंधुत्वाच्या विचारांनी भारतीय समाजाला नवी दिशा दिली आहे.
नगराध्यक्ष अॅड. प्रणोती सागर निंबोरकर यांनी आपल्या मनोगतात सांगितले की, “महात्मा ज्योतिबा फुले यांचे विचार आजही तितकेच प्रेरणादायी आहेत. समाजातील प्रत्येक घटकापर्यंत शिक्षण पोहोचवणे आणि समानतेची भावना रुजवणे हे आपले कर्तव्य आहे. त्यांच्या कार्यातून प्रेरणा घेऊन आपण समाजहितासाठी अधिक जोमाने कार्य करणे आवश्यक आहे.”
यावेळी नगरसेवक, सभापती तसेच नगर परिषद कर्मचारी मोठ्या संख्येने उपस्थित होते. कार्यक्रमाचे वातावरण अत्यंत प्रेरणादायी आणि भावपूर्ण झाले होते.
महात्मा फुले यांच्या जयंतीनिमित्त आयोजित या कार्यक्रमामुळे त्यांच्या कार्याची आणि विचारांची नव्याने आठवण होत असून, समाजात समता, बंधुता आणि शिक्षणाचा संदेश अधिक दृढ करण्याचा संकल्प यावेळी करण्यात आला.
