लांझेडा येथील मेटे मोहल्ला येथे मागील दीड वर्षांपासून बंद असलेला बोरिंग अखेर सुरू; नागरिकांना दिलासा
शिक्षण सभापती हर्षल गेडाम व नगरसेविका कोमल छत्रपती नैताम यांच्या सातत्यपूर्ण पाठपुराव्याला यश
गडचिरोली : लांझेडा येथील मेटे मोहल्ला परिसरात मागील दीड वर्षांपासून बंद अवस्थेत असलेला पिण्याच्या पाण्याचा बोरिंग अखेर सुरू करण्यात आला असून, त्यामुळे परिसरातील नागरिकांना मोठा दिलासा मिळाला आहे. स्थानिक रहिवाशांना गेल्या अनेक महिन्यांपासून पाण्यासाठी मोठी गैरसोय सहन करावी लागत होती. विशेषतः उन्हाळ्याच्या दिवसांत महिलांना व ज्येष्ठ नागरिकांना दूरवरून पाणी आणावे लागत असल्याने तीव्र नाराजी व्यक्त होत होती.
या समस्येची दखल घेत शिक्षण सभापती हर्षल गेडाम व नगरसेविका कोमल छत्रपती नैताम यांनी संबंधित विभागाशी सातत्याने पाठपुरावा केला. अधिकाऱ्यांशी चर्चा, प्रत्यक्ष स्थळ पाहणी आणि तांत्रिक अडचणी दूर करण्यासाठी केलेल्या प्रयत्नांमुळे अखेर बोरिंग दुरुस्तीचे काम पूर्ण होऊन पाणीपुरवठा सुरळीत करण्यात आला.
बोरिंग सुरू होताच परिसरातील नागरिकांनी समाधान व्यक्त करत लोकप्रतिनिधींचे आभार मानले. “दीड वर्षांपासून प्रलंबित असलेली समस्या सोडवली गेल्याने आमची मोठी अडचण दूर झाली आहे,” अशी भावना नागरिकांनी व्यक्त केली.
स्थानिक प्रशासनाने देखील भविष्यात अशा समस्या उद्भवू नयेत यासाठी नियमित देखभाल व तपासणी केली जाईल, अशी ग्वाही दिली आहे. पाणी ही मूलभूत गरज असून नागरिकांना अखंड व स्वच्छ पाणीपुरवठा देण्यासाठी प्रशासन कटिबद्ध असल्याचे यावेळी स्पष्ट करण्यात आले.
लांझेडा मेटे मोहल्ल्यात बोरिंग सुरू झाल्याने परिसरात आनंदाचे वातावरण निर्माण झाले असून, लोकप्रतिनिधींच्या तत्परतेमुळे नागरिकांच्या दैनंदिन जीवनातील मोठी अडचण दूर झाल्याची भावना सर्वत्र व्यक्त होत आहे.
