वीर बाबूराव शेडमाके न.प.विसापूर शाळेच्या नवनिर्मित इमारतीची शि.स. हर्षल गेडाम,बां. स. अनिल कुनघाळकर यांनी घेतला सुविधांचा प्रत्यक्ष आढावा
शिक्षण सभापती हर्षल गेडाम यांनी विद्यार्थी व शिक्षकांशी साधला संवाद; समस्या जाणून घेत सोडविण्यासाठी पुढाकार
बांधकाम पूर्ण झालेल्या शाळा इमारतीतील सुविधांचा घेतला आढावा; बांधकाम सभापती अनिल कुनघाळकर, नगरसेवक ज्ञानेश्वर मडावी, सोशल मीडिया संयोजक सुरज गुंडमवार यांच्यासह न.प. कर्मचाऱ्यांची उपस्थिती
गडचिरोली : वीर बाबूराव शेडमाके नगर परिषद उच्च प्राथमिक शाळा, विसापूर येथील बांधकाम पूर्ण झालेल्या नवनिर्मित शाळा इमारतीची नगर परिषदेच्या पदाधिकारी व कर्मचाऱ्यांनी प्रत्यक्ष पाहणी केली. यावेळी नवीन इमारतीतील उपलब्ध सुविधा, वर्गखोल्या तसेच विद्यार्थी व शिक्षकांच्या दृष्टीने आवश्यक असलेल्या मूलभूत सुविधांचा आढावा घेण्यात आला.
या पाहणीदरम्यान नगर परिषद शिक्षण सभापती हर्षल गेडाम, बांधकाम सभापती अनिल कुनघाळकर, नगरसेवक ज्ञानेश्वर मडावी यांच्यासह नगर परिषदेचे संबंधित कर्मचारी उपस्थित होते. पदाधिकाऱ्यांनी पूर्ण झालेल्या नवीन इमारतीची पाहणी करत विद्यार्थ्यांच्या शैक्षणिक गरजांच्या दृष्टीने आवश्यक बाबींची माहिती घेतली.
यावेळी शिक्षण सभापती हर्षल गेडाम यांनी शाळेतील शिक्षक आणि विद्यार्थ्यांशी थेट संवाद साधला. विद्यार्थ्यांना शिक्षण घेताना येणाऱ्या अडचणी, तसेच शिक्षकांना अध्यापन करताना आवश्यक असलेल्या सुविधा व अन्य समस्यांबाबत त्यांनी सविस्तर माहिती जाणून घेतली. विद्यार्थ्यांच्या शैक्षणिक हिताशी संबंधित समस्या प्राधान्याने सोडविण्यासाठी आवश्यक पाठपुरावा करण्यात येईल, असे त्यांनी सांगितले.
विद्यार्थ्यांना दर्जेदार शिक्षणासोबत सुरक्षित, स्वच्छ आणि सुसज्ज शैक्षणिक वातावरण उपलब्ध करून देणे ही नगर परिषदेची प्राथमिकता आहे. नवनिर्मित इमारतीमुळे विद्यार्थ्यांना अधिक चांगल्या वातावरणात शिक्षण घेता येणार असून, आवश्यक असलेल्या उर्वरित सुविधांची पूर्तता करण्यासाठीही संबंधित विभागाकडे पाठपुरावा करण्यात येईल, अशी भूमिका शिक्षण सभापती हर्षल गेडाम यांनी व्यक्त केली.
बांधकाम सभापती अनिल कुनघाळकर यांनीही पूर्ण झालेल्या इमारतीची पाहणी करून विविध बाबींचा आढावा घेतला. शाळेची इमारत विद्यार्थ्यांसाठी अधिक सुविधाजनक व्हावी, तसेच इमारतीतील उपलब्ध सुविधांचा विद्यार्थ्यांना योग्य प्रकारे लाभ मिळावा, याबाबत संबंधित कर्मचाऱ्यांशी चर्चा करण्यात आली.
वीर बाबूराव शेडमाके नगर परिषद उच्च प्राथमिक शाळेच्या नवीन इमारतीचे बांधकाम पूर्ण झाल्याने विसापूर परिसरातील विद्यार्थ्यांसाठी सुसज्ज शैक्षणिक सुविधांची भर पडली आहे. या नवीन इमारतीमुळे विद्यार्थ्यांना अधिक चांगल्या वातावरणात शिक्षण घेण्याची संधी उपलब्ध होणार असून, शाळेच्या शैक्षणिक गुणवत्तेला आणि सुविधांनाही बळ मिळणार आहे.
